Plantun de Prouvènço

Pèr coumpara dos planto d'encò nostre

Filago germanica & Panicum barbipulvinatum

Coutounado(-d'Alemagno)

Filago germanica

Asteraceae Compositae

Àutri noum : Erbo-à-coutoun, Erbo-coutounado, Erbo-di-tarnagas, Erbo-griso.

Noms en français : Cotonnière commune, Cotonnière d'Allemagne.

Descripcioun :
La coutounado d'Alemagno trachis dins li tepiero seco, lis ermas e li champ sus un sòu pulèu safrous. En coumparesoun emé si cousino, lis erbo-coutounado, es uno planto que pòu èstre pulèu grando (fin qu'à 40 cm). Douno d'èr à Filago pyramidata, pamens li fueio permeton de faire la diferènci. Aquéli de Filago germanica soun longo , toujour quàsi de la meme larjour e peréu envertouiado. Au contro la coutounado-piramidalo a li fueio en patelo e èi mai pichoto, mai blanco e trapoto.

Usanço :
Couneissèn pas d'usanço particuliero pèr aquelo planto.

Port : Erbo
Taio : 5 à 40 cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Filago
Famiho : Asteraceae
Famiho classico : Compositae
Tribu : Gnaphalieae
Ordre : Asterales

Coulour de la flour : Jauno
Petalo : >6
Ø (o loungour) flour : Pancaro entresigna
Flourido : Printèms

Sòu : Si
Autour basso e auto : 0 à 800 m
Aparado : Noun

Liò : Tepiero seco - Champ - Terraire safrous
Estànci : Termoumediterran à Coulinen
Couroulougi : Pancaro entresigna
Ref. sc. : Filago germanica L., 1763 (= Filago vulgaris Lam., 1779 )

Mi(-de-ribeirés)

Panicum barbipulvinatum

Poaceae Graminaceae

Noms en français : Panic des rivages, Millet des rivages.

Descripcioun :
Aquéu mi fèr, que nous vèn d'Americo de l'uba, sèmblo proun au mi-prim, Panicum capillare, que se rescontro proun dins lis ermas e li champ à l'autouno. Se n'en destrìo emé sis espigueto de coustat que soun pourtado pèr de pecou courtet (< 3 mm) e que rèston proun proche de la ramo (< 10°). D'un biais generau lis espigueto soun mens aluenchado lis uno dis autro. Apoundèn qu'aquéstis espigueto soun mens grosso e pu fino. Pèr l'ouro es esta vist soulamen dins la valado dóu Rose, mai poudèn pensa qu'aquesto meno vai s'espandi. Coumpara emé lou mi-prim e lis àutri mi se n'avès pas l'usanço.

Usanço :
A bessai li mémis usanço que soun cousin lou mi-prim.